зъ васъ меть хотять? Жадныхъ! Ничого имъ не прыбудеть, одно веселье зъ болшое хвалы Божое, ижъ се хрестияне згажають; ижъ се братья, одъного Отца небеского дети, милують; ижь пострах будеть Туркомъ поганомъ, которые о розорванье Хрестияньское старають. Знайте упреимую и жадного пожитку нешукаючую католическую ку собе милость, кгды се о само доброе вашо збавенное старають, а ничого своего свецкого не ищуть, ани се по васъ сподевають. Дякуйте побожному и великих, цнотъ и милости ку Богу, королю своему, и епископомъ светымъ (своимъ), и инымъ, ижъ вамъ до тыхъ вечныхъ добръ такъ упреиме помагають, а не хотите быть невдячными, грубыми, которые добродеевъ своихъ не знають, або брати одъ нихъ такъ дорогихъ и збавенныхъ скаръбовъ не хотять.
Пересторога на потвары противниковъ собору Берестейского.
Роздѣлъ 12.Перестережитесе, прошу, на неупреймость (и кламства), и пострахи, и потвары противниковъ собору (светого) Берестейского.
Мовять, ижъ «соборъ свои у Берестью мели и одъправили“. То спросные вымыслы и невъстыдъ. Не соборъ, на которомъ епископи заседають, але сеимикъ якийсь, одь короля его милости заказаныи, зъ маршалкомъ новокръщеньцомъ мели. Не въ церкви, где соборы бывають, але въ дому, въ которомъ за старость геретыцькихъ блюзнеръства противъ Богу мешкали и теперъ меш-
