людъ веръный гойные слезы выливали, радуючисе такъ щастъливой и давно жаданой отъ предъковъ нашихъ године и ласце Господа Бога нашого, Который роспорошоные згромажаетъ, а покоръные подъвышьшаетъ, и отъ церкви Своее, которую откупилъ кровью Своею, милосерьдя Своего не отдаляетъ.
Назавътрее, въ неделю, ихъ милость превелебные отцы аръхиепископъ Львовъский зъ епископами и съ послы его королевское милости и з-ыными костела Рымъского християны шли до церкви светого Миколы, и тамъ литуръгии светое слухали, и нахвалебъной унеи службы, оѳѣры и обрядовъ, згоды зъ Латинъскою мъшою (здавна) полныхъ, зъ радостью и набоженъствомъ заживали. Тамъже казнодѣя короля его милости казанье о едности церкви Божое и о той щастливой зъгоде и покою Христовомъ чинилъ. Съ тымъ се, осмотревши писмомъ и печатьми, што было потреба, въ великой милости розъехали, славечи Бога въ Тройцы единого, Который живетъ и пануеть на вѣки. Аминь.
Дъяки светого събору за росказаньемъ старъшихъ.
Яко кождая речь добрая и светая маеть свое спротивники, а всюды неприятелъ межи пшеницу свой куколь розсеваеть, такъ и светые вселенские съборы духовъныхъ, на которыхъ се правда Божая и зъгода збавенъная християнъская утвержаетъ, николи безъ объмовцовъ и потварцовъ не были. Претожъ не дивъ, ижъ и тотъ съборъ поместный Берестейский маеть тежъ
