Старонка:Збор твораў (Бядуля, 1937). Том I.pdf/143

„ЖЫДЫ“

I

Ноч без месяца, без зорак.
Вышла восень на падворак,
А на ёй сукенка з воўны.
Ці туман быў — усёроўна.
Колькі гора і пакут,
Мы гасцей чакаем тут.

Зараз будзе тры нядзелі —
Мы не спалі, мы глядзелі…
Аж дрыжыць у нас хаціна
Ад гарматнай страляніны.
Значыць хутка казакі
Зоймуць нашыя куткі.

Уначы відны пажары,
Дым удзень заместа хмараў.
То праходзіць гурт жывёлы,
То праедзе невясёлы
Доўгі бежанцаў абоз.
Многа гора, многа слёз.