Старонка:Барвенак (1924).pdf/144

ПЛЫЦЬ ХАЧУ.

Плыць хачу я к сьветлай далі
На чаўне пад парусамі
І сачыць, як плешчуць хвалі,
Расплятаюцца касамі;

Пад іх спрэчную гамонку
Я спрачацца хачу з бурай,
З песьняй вольнай, з песьняй звонкай,
Гору справіўшы хаўтуры…

Хіба я ня князь ўладарны
Над жыцьцём і над стыхіяй?
Ня згублю свой шлях я марна,
Не застрашаць сны ліхія

Маю прагу к сьветлым далям,
Што маякам зіхацяцца…
Хай мой чоўн хістаюць хвалі, —
З бурай здолею спрачацца!..

1923 г.