Старонка:Барвенак (1924).pdf/125

ПЕРШЫ СЬНЕГ.

Толькі неба перастала
Плакаць, ліць сьлязінкі —
Закружылісь, заляталі
Першыя сьняжынкі;

Крыюць дрэвы, крыюць стрэхі,
На зямлю садзяцца,
Разгуляюцца пацехай,
Срэбрам мігацяцца…

І заслаўся дол ўвесь голы
Тоўстым слоем-плахай;
Вецер з жальбай невясёлай
Ўзносіць гурбы ўзмахам…

Душу болем і жальбою
Цісьне ён бясконца…»
Хоць і цяжка — ўсё-ж вясною
Зноў зазьяе сонца…

1922 г.