Спатканьні (1925)/Песьні зурновыя/Памяці Лермантава

Памяці Лермантава
Верш
Аўтар: Алесь Гурло
1925 год

Іншыя публікацыі гэтага твора: Памяці Лермантава (Гурло).

Прапануем да спампаваньня!

Вось тут, вось тут сярод красы,
Абвітай чарамі туману,
Вось тут, дзе гоманам лясы
Ўспамінкі родзяць цяжкай раны —

Тут колісь-та ў начной цішы
Сышліся два на паядынак:
Ў адным вітала волі шыр
Ды дух высокі сакаліны;

Другі быў — проста пустата,
Ніхто якое-б ня прыкмеціў,
Калі-б ён зданьню не паўстаў,
Калі-б крывёю не адмеціў

Той шлях — вялікі шлях жыцьця,
Што многім ўзьняў к прастору крыльлі,
А ў многіх іх зусім адцяў,
Каб лёт нікчэмны супынілі,

І вось варожая рука,
Навёўшы рулю пісталета,
Пад стогн жалобны Машука
Забіла шчырага поэта.

Вось тут цяпер, каля гары,
Абросшай ліпамі і клёнам,
Пры бляску сонца і зары
Стаіць самотна белы помнік.

Машук.