Спадчына (1922)/III/Мая вера

Мая вера
Верш
Аўтар: Янка Купала
1922 год

Іншыя публікацыі гэтага твора: Мая вера (Купала).

Прапануем да спампаваньня!

МАЯ ВЕРА.

Ня веру ідалам паганым,
Што выразаюць разьбяры,
Бажкам ня веру маляваным,
Што мажуць фарбай маляры.

Ня веру купленым прарокам,
Што з казальніц за грошы лгуць
І сочаць прагавітым вокам,
Скуль больш чырвонцаў ім нясуць.

Ня веру ў фокусьнікаў цуды
Усіх народаў і вякоў,
Што ў ход пускаюць хітра ўсюды
Туман на цёмных сьлепакоў.

Ня веру ў каменны багоўні,
Ў людзкой асьвенчаны крыві,
Дзе толькі вяжуць, бы ў прытоне,
Жывому духу ланцугі.

Ні за якую плату, меру
Ня дамся тэтай варажбе…
Ў народ і край свой толькі веру
І веру ў самага сябе.

12/VII—11 г.