Раніца рыкае (1925)/Я/Васількова-зялёнаю ночкай

← ⁂ (Туляўся выбоямі грэблі)

⁂ (Васількова-зялёнаю ночкай) Верш Аўтар: Язэп Пушча 1925 год

Мне чупрыны ня хочацца зьвесіць →

Іншыя публікацыі гэтага твора: Васількова-зялёнаю ночкай…

Прапануем да спампаваньня!

∗
∗     ∗

Васількова-зялёнаю ночкай
я зрэбную вёску пакінуў
і ў горад замызганы ў прочкі
пайшоў я з бярозавым кіем.

Заірзаў вараненькі пры ясьлях,
як выходзіў я за вароты,
а клён ўздагон лісьцямі спляснуў, —
забляяла зара ў агародзе.

Сабака правёў да прысадаў
і назад невясёла памуляў.
Лапушыся ой, песьня, расадай
без мяне у вясковым завульлі!

Я зараз у Менску гарбатым
ды раніцай новай буяню.
Ня сумуй-жа, мужычая хата,
што ўзрасьціла мяне грубіяна!

Твая песьня напоўніла грудзі, —
у заўтра я з ёю вяслую.
Галавы-ж раскудлачаны кудзер
карагодзіць блакітам вясну.

Дык бывай-жа здарова, о вёска,
са старэнькай бабулькай-вярбою!
Ужо сонца закінула вёслы
у песьні майго вадапою.