Песьня Беларусі
Песьня Беларусі Верш Аўтар: Андрэй Зязюля Крыніца: http://media.catholic.by/nv/n18/art3.htm |
Божа, што калісь народы
На асобкі падзяліў,
І хацеў, каб народ кожны
Мовай роднай гаварыў.
Узглянь жа на народ бяздольны
Беларускі, што к Табе
Голас ціхі, паднявольны
У пакорнай шле мальбе.
Асьвяці наш розум верай,
Льгі надзею ў душу ўлі
І агонь любові шчырай
Ў сэрцах зімных запалі.
Дай, каб зернятка прабуды
Заляцела ў кожны кут
Беларусі, каб усюды
Узышло – і там, і тут.
Каб рунела, выплывала,
Красавала, наліло
І, насьпеўшы, у ток нямала
Умалоту прынясло.
Памажы нам, Божа мілы,
Прабудзіцца да жыцьця;
Удзялі парады, сілы,
Каб ня збіліся з пуцьця.
Дык жыві-ж Ты і красуйся,
Наша Маці – Беларусь!
Да краёў чужых раўнуйся;
Йсьці дзяцей к табе прымусь!
Хай бяруцца да работы
Дом народны будаваць
І багацяцца у цноты,
Каб пасьля ім Рай дастаць.