Памяці М.Багдановіча

З пляцоўкі Вікікрыніцы
Перайсці да навігацыі Перайсці да пошуку
Памяці М.Багдановіча
Верш
Аўтар: Пятро Глебка
1927
Крыніца: https://knihi.com/Piatro_Hlebka/Viersy_1925-1967.html#chapter46

Спампаваць тэкст у фармаце EPUB Спампаваць тэкст у фармаце RTF Спампаваць тэкст у фармаце PDF Прапануем да спампаваньня!




Ты ня знойдзеш, жалоба, выйсьця,
нават песьню пачуўшы другую.
Ул. Дубоўка.

Ці то восень была, ці зіма, ці вясна,
А ці сонца свяціла, ці зоры?
Пахіліўся на дол і пагорбіўся стан...
Кіпарысы наўкола і мора.
 
Хвалі на моры
Сумуюць, гавораць:
Хто і дзе?
Вецер галосіць,
Чорная просінь
На вадзе.
 
Не цвілі васількі, а кізілы цвілі,
Калі жвір на труну уссыпалі,
Скаргі скрозь праляглі на пясчанай зямлі,
Толькі бурна імкнуліся хвалі.
 
Хвалі на моры
Сумуюць, гавораць:
Хтосьці знік.
Людзі прыпалі,
На стромкія скалы
Палі ніц.
 
Ці стаяў, а ці не над магілаю крыж,
Толькі помнік стаіць на узвышшы.
Не зязюля, а чайкі узвеялі крык,
Узняліся над морам і вышай...
 
Хвалі на моры
Сумуюць, гавораць:
Скрозь — туман.
Ён цяжкай часінай
Заўчасна загінуў
І... няма.
 
Спавіла яго смерць, але песня жыве —
Хіба песня калі бо загіне?!
Да магілы сляды на зялёнай траве,
Быццам шлях на азёрах на сініх...
 
Хвалі на моры
Сумуюць, гавораць,
Коцяць жвір.
Вэлюм на вочы...
Хвалі прарочаць:
Ён — жывы!