На залатым пакосе (1927)/У разгары жыцьця/Мне хочацца любіць

← Адказ

Мне хочацца любіць Верш Аўтар: Валерый Маракоў 1927 год

Яшчэ адна →

Іншыя публікацыі гэтага твора: Мне хочацца любіць, задумацца і верыць…

Прапануем да спампаваньня!

∗     ∗
∗

Мне хочацца любіць, задумацца і верыць,
Душу з другімі душамі зьліваць.
Хай не адчыняць мне ў прыгожым доме дзьверы, —
Дармо! І ў полі можна начаваць.

Пад сінім месяцам такім далёкім-дальнім
Знайду я ўсё і радасьць і спакой…
Ня мне шукаць мяшчанскай ціхай спальні,
Ў вачох мяшчанскіх сініх васількоў.

Я не аб гэтым марыў!.. марыў я аб новым,
Другім, яшчэ нязьведаным жыцьці,
Каб не згараць дарма… зрываць з другіх аковы,
Дабром за ўсё… за ўсё дабром плаціць!

Дзе толькі людзі ёсьць, — задумацца і верыць,
Душу з другімі душамі зьліваць,
Хай не адчыняць мне ў прыгожым доме дзьверы, —
Дармо!.. І ў полі можна начаваць!