За вашу ласку панскую,
Палітыку шатанскую
Мы дзякуем, паны.
„Дабра“ зрабілі многа вы,
Залезшы ў наша логава,
Пабраўшы бізуны.
Наслалі нам асаднікаў,
Жандараў і вураднікаў
І іншае брыды —
Кунтушыкаў, каптурыкаў
І Антэкаў-мазурыкаў
Наперлі нам сюды,
Каб гэтыя дабродзеі
Вам польскасць тут праводзілі
На панскія лады.
І польскасць там праводзіцца.
На ўвесь наш край смуродзіцца.
Ксяндзоўская мана.
І веру каталіцкую
Падносяць нам і тыцкаюць —
На чорта нам яна?
Не возьмеш нас касцёламі,
Царквамі і саборамі —
На ліха нам ваш рай?
Таргуйце сабе душамі,
Як рэдзькаю ці грушамі,
А нас вы — не чапай!
Ды ліха ў тым, каханыя,
Што вы прышлі нязваныя,
Убіліся ў наш край.
Зрабілі яго „крэсамі“
І разам з пэпээсамі
Заслалі тут абрус.
Ад Брэста і да Случчыны
Пад пятамі пілсудчыны
Гаруе беларус.
Няма яму аддушыны,
А крык яго прыдушаны
Ўзвялі вы ў крымінал.
Паны! ці мелі рацыю
За крык той судзіць нацыю,
Упасці ў такі шал?
Паны! рэкорд пабілі вы
І як тут не адвілівай,
А роўных вам няма.
І тактыку ксяндзоўскую
І школу мураўёўскую
Прайшлі вы не дарма.
1927 г.
|