Нашы дні (1937)/З Рабіндраната Тагора (Скажы мне, мой любы, ці праўда ўсё гэта…)

← З Рабіндраната Тагора

З Рабіндраната Тагора Верш Аўтар: Рабіндранат Тагор 1937 год Арыгінальная назва: XXXII. Tell me if this be all true, my lover (1913) Пераклад: Якуб Колас

На Каўказе →

Іншыя публікацыі гэтага твора: Скажы мне, мой любы, ці праўда ўсё гэта…

Прапануем да спампаваньня!

З РАБІНДРАНАТА ТАГОРА

Скажы мне, мой любы, ці праўда ўсё гэта:
Калі мае вочы — узлёты зарніц,
Тады тваё сэрца — адсвет бліскавіц,
Душа-ж ў грымотныя хмары адзета?

Ці праўда, што соладкі вусны мае,
Як лісцік разгорнуты краскі тае?
Што чарамі вёсен цвіце маё цела,
Што песняй, як арфай, зазвоніць зямля,

Як толькі нага па ёй ступіць мая?
Ды то не мана, што і ночка нясмела
Мне ў радасці плача бліскучай расой,
Што я аздабляю і золак сабой?

Ці праўда, што толькі адну мяне ў свеце
Шукала каханне тваё, дарагі,
Блукаючы доўга па свеце тугі,
Каб сэрца сугучнасць пачуць, запрымеціць?

Калі-ж тваё сэрца мяне напаткала,
То радасць, бязмернае шчасце пазнала.
І слодыч пачуў ты ў словах маіх,
У гутарках ціхіх, вачах маіх чорных,

І кудрах дзявочых маіх непакорных,
І ў мне адбіваецца кожны твой міг,
І вечнаю тайнасцю я ўся адзета.
Скажы-ж мне, мой любы, ці праўда ўсё гэта?

1926 г.