Начлег

З пляцоўкі Вікікрыніцы
Перайсьці да навігацыі Перайсьці да пошуку
Начлег
Верш
Аўтар: Алесь Гарун
Крыніца: http://rv-blr.com/vershu/view/72203


Сьпіць душа, і розум сьпіць,
Смачна, без трывогі,
Піць і есьці, есьць і піць –
Клопат ўвесь нямногі.

         Лёгка так. Ня маеш дум...
         Ў прочках гдзесь маркота...
         Боль прайшоў, уняўся сум, –
         Спаць адно ахвота.

Сьпіць душа... і розум сьпіць!
Часам нехта ўзбудзіць,
Нібы ўстыдзіць, нібы кпіць,
Нібы крышку судзіць:

         «Сорам, брат...» А далей слоў
         Я праз сон ня чую.
         Зьнікне голас, ціха зноў...
         Ў ясны дзень – начую.