З ценямі думкі, а з думкамі цені…

З пляцоўкі Вікікрыніцы
Jump to navigation Jump to search
З ценямі думкі, а з думкамі цені…
Верш
Аўтар: Валеры Маракоў
Крыніца: http://old.knihi.com/marakou_v/



 * * *

З ценямі думкі, а з думкамі цені
Ўдаль па шпалерах бягуць.
Нехта стаіць прад зарой на каленях,
Выпіўшы сэрца разгул.

Месяц чырвонцам скаціўся у травы,
Ціш, хоць душу вынімай,
Сёння мне песень, пачуццяў і славы,
Тых, што ў нікога няма!

Выйду расхрыстаю, поле і месяц
Грудзі ўстрывожаць наўсцяж,
Будзе мне блізкай далёкая песня
Вольных прыбояў жыцця.

Нехта стаіць прад зарой на каленях,
Выпіўшы сэрца разгул,
З ценямі думкі, а з думкамі цені
Ўдаль па шпалерах бягуць.

(1927)