|
Бегаў бай па сьцяне
У чырвоным каптане.
Байку баіў. Ай, лю-лі!
Жылі пчолкі у вульлі…
Баіць ці не?
— Баіць!
Бегаў бай па сьцяне…
Шла вясна па вясьне,
Жылі пчолкі з году ў год,
Бралі ў соты з кветак мёд…
Баіць ці не?
— Баіць!
Бегаў бай па сьцяне…
Ніхто пчолак не кране;
Самі мёд зьбіраюць той,
Самі ласваюць зімой…
Баіць ці не?
— Баіць!
Бегаў бай па сьцяне…
У тэй самай старане
Пустапасам труцень жыў,
Неяк з пчолкамі здружыў…
Баіць ці не?
— Баіць!
Бегаў бай па сьцяне…
Труцень кажа: „Дайце мне
Глянуць, пчолкі, у вульлёх
Паспытаці ваш мядок!..“
Баіць ці не?
— Баіць!
Бегаў бай па сьцяне…
Ці так добра, ці так не, —
Пчолкі добрымі былі,
Трутня ў госьці прынялі…
Баіць ці не?
— Баіць!
Бегаў бай па сьцяне…
Труцень пальцам ня кіўне;
Пчолкі мёд вясуць да сот,
Труцень есьць ды есьць той мёд.
Баіць ці не?
— Не!
Менск, 6-III 1921 г.
| 
Прапануем да спампаваньня!