Збор твораў (Купала, 1925—1932)/V/II/Тут і там

← ⁂ (Можам часта мы плакаць…)

Тут і там Верш Аўтар: Янка Купала 1928 год

У хорамах →

Іншыя публікацыі гэтага твора: Тут і там (Купала).

Прапануем да спампаваньня!

ТУТ І ТАМ

Вы тут гуляеце, панове,
У сытай, п‘янай чададзе,
А там — што робіцца у вёсцы,
І ў думку вам не набрыдзе.

Тут у крыві людзкой скупана
Капейка сходзіць за дармо;
А там, у вёсцы ў непацешнай,
Расьце, вялічыцца ярмо.

Тут вы прышлі разьбіць аб чаркі
І чэсьць і славу напалам;
Там горы ўзносяць, рыюць ямы,
Каму? — згадаць пара ўжо вам!

1909 г.

---