Збор твораў (Купала, 1925—1932)/II/Бацькаўшчыне/Паляці, мая мысьль…

← Сваяком па гутарцы

Паляці, мая мысьль… Верш Аўтар: Янка Купала 1926 год

Рвіся, думка!.. →

Іншыя публікацыі гэтага твора: Паляці, мая мысьль…

Прапануем да спампаваньня!

ПАЛЯЦІ, МАЯ МЫСЬЛЬ…

Паляці, мая мысьль,
Лётам сокала
І прагледзь гэты сьвет
Кругом-вокала.

Лётам сьветлай зары
Па-над стрэхамі —
Сып надзеяй жывой
І пацехамі.

Пей аб волі людзям
Думкі цудныя,
Уміляй іх жыцьця
Сьцежкі трудныя.

Залатыя сны ім
Няхай рояцца;
Няхай жаль на душы
Супакоіцца.

Гоняць хай ад сябе
Цьмы нядольныя,
І рука у руку
Пойдуць вольныя.

Так ляці, эй, ляці,
Мысьль свабодная!
А ты міла спаткай,
Зямля родная.

---