Збор твораў (Колас, 1928—1929)/I/2/VI/На чужыне

← На рэчцы

На чужыне Верш Аўтар: Якуб Колас 1928 год

Поле →

Іншыя публікацыі гэтага твора: На чужыне (Край далёкі, край чужэнькі…).

Прапануем да спампаваньня!

НА ЧУЖЫНЕ

Край далёкі, край чужэнькі
Каля гор Урала!
Ты зжыла век маладзенькі,
Сьмерць тут напаткала.

Хто-ж пакажа матцы роднай,
Бежанцы пахілай,
Крыж над ямаю халоднай,
Доччынай магілай?

Хто раскажа, як ты млела,
Як душой знывала,
Як на сьвеце жыць хацела,
Бо жыла ты мала?

Рвалась сэрца к родным гоням
Птушкай лёгкакрылай,
К сьветлым рэчкам, ціхім тоням
Белай Русі мілай.

Толькі-ж выпаў не па сіле
Крыж табе, дзяўчына,
І ўлажыла спаць ў магіле
Жорсткая чужына.

І нікому невядомы
Будзе лёс твой горкі,
І ня ўчуюць сьпеў знаёмы
Родныя пагоркі.

Ты сканала, і разрухі
Больш ня будзеш бачыць.
Хай хоць ветры-завірухі
Па табе паплачуць.

1916 г.