Збор твораў (Колас, 1928—1929)/I/2/VI/Змаганьнікам за кастрычнік

← А. Луцкевічу

Змаганьнікам за кастрычнік Верш Аўтар: Якуб Колас 1928 год

Іншыя публікацыі гэтага твора: Змаганьнікам за Кастрычнік.

Прапануем да спампаваньня!

ЗМАГАНЬНІКАМ ЗА КАСТРЫЧНІК

Бушавала бура з сілай нячуванай,
А вы шлі пакорна крокам нястрыманым.

Вар’яцела мора, пеніліся хвалі,
А вы шлі няспынна — вабілі вас далі.

Бухалі гарматы, гукацелі громы,
А вы шлі наперад віхрам — бураломам,

Разьбівалі ковы, векавыя путы,
А на кожным кроку вораг злы і люты.

І было змаганьне, ой, было змаганьне!
Не хацеў стары сьвет страціць панаваньня.

Каледзін, Карнілаў, Колчак і Дзянікін —
Шла навала супраць у шаленстве дзікім.

І каваў кайданы вораг заграніцай,
Ды ніхто ня здолеў той жывой крыніцы.

Ліха, небясьпека ўсюды вас чакала. —
Згінула ў дарозе змагароў ня мала.

А дарога ваша — горы, перавалы,
Але ўсё здалелі раці занядбалых.

Пройдзен шлях пачэсны, трудны і вялікі,
Не зальле яго той шквал шалёна-дзікі,

Што падняць гатовы Чэмбэрлен зацяты —
Кінуты па сьвеце добрыя зярняты.

Выйшлі зерні тыя ў шоўкавыя руні —
Праўдай сталі вашы мары аб комуне.

1927 г.