Збор твораў (Колас, 1928—1929)/I/2/VI/Будзь цьвёрдым

З пляцоўкі Вікікрыніцы
Як і калісь Будзь цьвёрдым
Верш
Аўтар: Якуб Колас
1928 год
Старыя песьні
Іншыя публікацыі гэтага твора: Будзь цьвёрды.

Спампаваць тэкст у фармаце EPUB Спампаваць тэкст у фармаце RTF Спампаваць тэкст у фармаце PDF Прапануем да спампаваньня!




БУДЗЬ ЦЬВЁРДЫ

Ты ня гніся, брат, ніколі
Траўкаю пахілай:
Сам пружыны сваёй долі
Выкуй ўласнай сілай!

Бо хоць кажуць, што з уклону
Не баліць галоўка, —
Не зважай: з ярма-прыгону
Вышла гэта слоўка.

Не прасі, не спадзявайся
Ты на дапамогу:
Сам з нягодамі змагайся,
Сам прабі дарогу!

Хоць памогуць табе людзі
Адшукаць дарогі,
А саб‘ешся, зноў ты будзеш
Абіваць парогі.

Ня лісьціся к сільным, дружа,
Зельлейкам-бярозкай,
Бо ня выдзеш век з пад гужу,
Страціш вобраз боскі,

І ў людзей ты гонар страціш —
І цябе зракуцца:
Лепш змагацца вольным, браце,
Чым цярпець ды гнуцца!

1912 г.