Заранкі (1924)/Новая жалейка

← Першага мая

Новая жалейка Верш Аўтар: Янка Журба 1924 год

Чырвоны сьцяг →

Прапануем да спампаваньня!

НОВАЯ ЖАЛЕЙКА.

Дзіўная рэч нам зьявілася:
Мары ўвайшлі у жыцьцё.
З краем маё аднавілася
Сэрца і з ім пачуцьцё.

Смутныя струны, парвецеся, —
Годзе вам жудасна ныць!
Больш ужо, сьлёзы, ня лецеся:
Сонейка шчасьця блішчыць!

Кіну жалейку журботную, —
Стала ў жыцьці нам сьвятлей.
Кіну я песьню маркотную
І запяю весялей.

Зроблю жалейку я новую,
Жыцьця сяброўку маю,
Сэрцам вясёлым маёвую
Песьню змаганьня сьпяю.