Заранкі (1924)/Незабудкі

Незабудкі
Верш
Аўтар: Янка Журба
1924 год

Прапануем да спампаваньня!

НЕЗАБУДКІ.

Вас я ўбачыў пры дарозе,
Кветкі-незабудкі, —
І зайгралі ў маім сэрцы
Гусьлі-самагудкі.

Помню: мы былі у полі,
Кветкі красавалі…
Гэным летам шмат мы дзіўных,
Сьветлых мар снавалі.

Незабудачкі ірваў я
З мілаю дзяўчынай…
Не забудзецца ніколі
Сьветлая часіна.

Любаваўся я табою
І глядзеў у вочы:
Вочкі чорныя мігцелі,
Як агонь уночы.

Нашу любасьць маладую
Птушкі прывіталі;
Мы у сонца пазалоце
Марамі луналі…

Вас я ўбачыў пры дарозе,
Кветкі-незабудкі, —
І зайгралі ў маім сэрцы
Гусьлі-самагудкі.