|
Лійцесь, песьні,
На прадвесьні,
Узьнімайце вы людзей;
Зазьвініце,
Паляціце
Вы над вёскаю хутчэй!
Гэй, рухайся,
Абуджайся,
Беларускі родны край!
Ясна сонца,
У старонцы
Якхутчэй мацней зазьяй!
Трэба скора
Сьнегу горы
На палетках растапіць
І вадзіцай;
Як жывіцай;
Землю-матку напаіць,
Каб прыгожа
Наша збожжа
Аксамітам зацьвіло,
Край каб мілы
Набраў сілы,
Што дае вясны цяпло;
Каб нам зьялі,
Красавалі
Нашы нівы і сады:
Будзем сыты
І акрыты,
Будзе шчасна нам тады…
Лійцесь, песьні,
На прадвесьні,
Узьнімайце вы людзей;
Зазьвініце,
Паляціце
Вы над вёскаю хутчэй!
|
Прапануем да спампаваньня!