Заранкі (1924)/Дзеткам/Пчолка

← Шпак

Пчолка Верш Аўтар: Янка Журба 1924 год

Пастушок →

Прапануем да спампаваньня!

ПЧОЛКА.

Толькі наступіла
Пара веснавая, —
Выляцёла ў поле
Пчолка залатая.

Ёй за шчырай працай
Весела і шчасна;
Тут красуе верба,
Сонца сьвеціць ясна;

Лётае па красках
Пчолка працаўная,
Кветачкі цалуе
І мядок зьбірае.

Назьбірала пчолка
Пыльцы і мядочку:
Ім накорміць дзетак
У сваім дамочку…

У вульлі шумліва:
Праца там кіпела.
К родненькай сямейцы
Пчолка прыляцела.