Заранкі (1924)/Адрадзілася прырода…

Адрадзілася прырода…
Верш
Аўтар: Янка Журба
1924 год

Іншыя публікацыі гэтага твора: Адрадзілася прырода…

Прапануем да спампаваньня!

АДРАДЗІЛАСЯ ПРЫРОДА…

Адрадзілася прырода;
Зноў надзеі агарнулі:
У грудзёх калішні жальбы
Дзесь далёка патанулі.

Адрадзілася прырода…
Засьпявалі ў небе птушкі.
І з душы ізноў паволі
Льюцца песьні-весялушкі.

Луг і поле каля вёскі
Аксамітам зелянее;
З траўкі ўжо зірнулі кветкі.
Лес зялёны ўсё цямнее.

Сёньня з сошкаю араты
На палеткі каля гаю
З песьняй выехаў вясёлай
І вясну-красу вітае.

Адрадзілася прырода…
Край мой родны адрадзіўся,
К жыцьцю новаму васкрос ён,
Цяжкіх сноў к вясьне пазбыўся.

Веру, родная краіна, —
Возьмеш верх над злой цямрою,
Твае ворагі ўсе згінуць,
Шчасьце блісьне над табою!