Дні вясны (1927)/Кветкі красы/Ў чыстым полі на кургане…

← ⁂ (На сэрцы раны ёсьць…)

⁂ (Ў чыстым полі на кургане…) Верш Аўтар: Язэп Пушча 1927 год

⁂ (Я аддаў дню вясноваму дань…) →

Прапануем да спампаваньня!

∗
∗     ∗

Ў чыстым полі на кургане
маладыя клёны
вартавалі,
далі.

У іхнім шоламе зялёным
зоры зорнае міганьне
адсявалі,
расьсявалі.

Дажджавыя хмары-хвалі
асыпалі іх
асеньнім жалем.
Ветры песьні калыхалі
ў іхнім лісьці малажавым.

На усходзе сонца
яны сонечна шумелі.
Я заўсёды моцна
ап‘яняўся
іхнім шумам-хмелем.

Радасьць сэрца ён параніў
і ў душу запаў глыбока, —
вось таму
вясновым раньнем
у мяне сьляза спадае з вока.

Вось таму і шлю паклоны,
слоў сугучных граньне.
Ой, вы клёны,
мае клёны,
ў чыстым полі на кургане!