Вянок (1914)/У зачараваным царстві/Зьмяіны цар

← Над возерам

Зьмяіны цар Верш Аўтар: Максім Багдановіч 1914 год

Бура →

Іншыя публікацыі гэтага твора: Зьмяіны цар (Ў цёмным небе — хараводы…).

Прапануем да спампаваньня!

ЗЬМЯІНЫ ЦАР.

У цёмным небі — хараводы
Сіневатых зорак,
У цёмным небі сьвеціць месяц
Залатым сярпом…
Мы ўжо выйшлі с цесных, душных
Падзямельных норак,
На зімовы цёплы вырай
Цягнемся-паўзём.

У полі, ў лесі нам усюды
Праляглі дарожкі!
Устужкай рушымся між пушчы,
На сам перад — я.
Зіхацяць маей кароны
Залатые рожкі,
Цёмным блескам адлівае
Уся луска мая.

Нам ня трэба ні ад чога
Ноччу абароны, —
А спаткаем чэлавека,
Порт разсьцеле ён:
Залаты ражок яму
Я ураню с кароны,
І праз белу палатніну
Дальш мы папаўзём.