Водгульле (1922)/Покліч (Гэй, чуеце…)

← Дуб

Покліч (Гэй, чуеце…) Верш Аўтар: Якуб Колас 1922 год

Араты →

Іншыя публікацыі гэтага твора: Покліч (Гэй, чуеце, хлопцы? Дзе вы, адкажэце?..).

Прапануем да спампаваньня!

ПОКЛІЧ.

Гэй, чуеце, хлопцы? Дзе вы, скажэце?
Разьвеены ветрам па беламу сьвеце,

Па ўсіх вы куточках цішком распаўзьліся,
Ад думак даўнейшых сваіх адракліся;

Забылі вы песьні пра вольную волю,
Змаганьне за шчасьце і лепшую долю.

Адсьпевана песьня, бязсьледна прапала,
Бо хлеба скарынка язык завязала;

І нізка прыгнула вас першая бура—
Ацесьліва ваша, эх, хлопцы, натура.

І тыя ярэмьі, што вы асьмяялі,
Вы зноў-жа пакорна на шыі паклалі…

Ці чуеце, хлопцы?.. Адказу ня маю
І вечны вам покай ў вастрозе сьпяваю.

19/X 1909 г.