Водгульле (1922)/На павароце

На павароце
Верш
Аўтар: Якуб Колас
1922 год

Іншыя публікацыі гэтага твора: На павароце.

Прапануем да спампаваньня!

НА ПАВАРОЦЕ.

Мяне ўжо радуе і тое,
Што ночка стала убываць,
І што ад мёртвага пакою
Пачне прырода ажываць;

Што з кожным днём бліжэй к вясне мы,
Калі абудзяцца гаі,
І сон палёў, спакой іх немы
Пабудзяць з шумам ручаі.

Няхай шумяць вятры у полі
Халоднай злоснаю зімой,
Адну зіму мне быць ў няволі
За мураванаю сьцяной.

А там вясна, і блізка воля;
Другі раз родзішся на сьвет,
А леса шум і песьня поля
Сатруць з душы нягоды сьлед.

11/XII 1910 г.