Водгульле (1922)/Зіма

← Мяцеліца

Зіма Верш Аўтар: Якуб Колас 1922 год

На павароце →

Іншыя публікацыі гэтага твора: Зіма (Надышлі марозы…).

Прапануем да спампаваньня!

ЗІМА.

Надышлі марозы,
Рэчкі закавалі,
Белыя бярозы
Інеем убралі.

Замялі дарогі
Ветрыкі сьнягамі.
Лес, як дзед убогі
З белымі вусамі,

Апусьціў галіны
І стаіць гаротна,
Зрэдка верхавіны
Загудуць маркотна.

Мяккая пярына
Вочы адбірае;
Белая раўніна—
Ні канца, ні краю!

Пад пялёнкай белай
Травы і лісточкі.
Поле анямела,
Змоўклі ручаёчкі.

І схілілісь лозы,
Чуць гальлём хістаюць,
А ў палёх марозы
Ды вятры гуляюць.

16/XI 1910 г.