Водгульле (1922)/Гора мацеры

← Уночы

Гора мацеры Верш Аўтар: Якуб Колас 1922 год

Мацерына прычытаньне →

Іншыя публікацыі гэтага твора: Мацерына гора.

Прапануем да спампаваньня!

ГОРА МАЦЕРЫ.

За сялом у полі,
Ў жоўценькім пясочку,
Пахавала маці
Маладую дочку.
Зьнікла яе радасьць,
Старасьці апора,
І няма уцехі
Ў мацярынскім горы.

Ёй ніхто ня верне
Дарагой дачушкі.
Плачуць па дзяўчыне
Сваякі і дружкі:

Плача па ёй мілы,
Жаль яго вялікі,
Яго-ж гора сьціхне;
Змоўкнуць сэрца крыкі.

Ганначку забудуць
Сваякі і дружкі,
Не забудзе маці
Родненькай дачушкі.

Не загояць часы,
Бо глыбокі раны,
Сама ляжа маці
З імі ў гроб драўляны.

27/XI 1910 г.