Ветры буйныя (1927)/I/Ой, пайду

Ой, пайду
Верш
Аўтар: Паўлюк Трус
1927 год

⁂ →

Іншыя публікацыі гэтага твора: Ой, пайду…

Прапануем да спампаваньня!

ОЙ, ПАЙДУ…

Ой, пайду ў далячынь за сяло, —
Там, дзе жыта шуміць на паўмежку,
Там, дзе ў вішнях сяло расьцьвіло,
Завіваюцца кветкамі сьцежкі.

Падзіўлюся, як жнеі пяюць,
Засьпяваю і сам пра раздольле.
Ветры буйныя песьню маю
Разьнясуць па шырокаму полю!..

Ветры буйныя песьню вясны
Разьнясуць па зялёнай даліне.
Будзе гай на гары гаманіць,
Будзе плакаць у лузе каліна.

Пазьбіраю я сьлёзы-расу
І рассыплю у песьні крышталі, —
Тады ўбачыш ты радасьць і сум,
Як жыцьцё у няспыненых хвалях.

Ой, пайду ў далячынь за сяло, —
Там, дзе жыта шуміць на паўмежку,
Там, дзе ў вішнях сяло расьцьвіло,
Завіваюцца кветкамі сьцежкі…

1925 г.