Ветру

Ветру Верш Аўтар: Алесь Гарун

Крыніца: http://rv-blr.com/vershu/view/72003

Ветрэ, ветрэ вольны,
Стой, зрабі паслугу!
Буду спосаб меці,
Адзьдзякую другу.
         Зьлётай, лёгкі, борзда
         Ў край, адкуль я родам, –
         Бацьку, матку ўбачыш,
         Мілую заходам;
Ўбачыш гэнам, ворле,
Ў краю тым – старонцэ:
Брат мой беларусін
Гібее бяз слонца.
         Ім усім паклонам
         Нізкім ты: скланіся,
         Хай жывуць, красуюць...
         А потым вярніся.
Гэтта скажаш, браце,
Мне, што там убачыў.
Буду спосаб меці,
Паглядзіш, адзьдзячу!