Веснапесьні (1929)/Мінуўшчына

← З рабочых матываў

Мінуўшчына Верш Аўтар: Хведар Ільяшэвіч 1929 год

У майскі вечар →

Іншыя публікацыі гэтага твора: Мінуўшчына (Ільяшэвіч).

Прапануем да спампаваньня!

МІНУЎШЧЫНА.

Аддайце славу нашу нам —
Нашто схавалі, расхапалі!!!

Між лет доўгіх няволі й сна,
Зімы й начэй, скаваўшых край, —
Шукаю я цябе, о, май!..
Цябе — народная вясна…

Быў май… Цьвіло, гуло жыцьцё.
Мігнуў пярун… Прамчаўся конь…
Нясуцца войскі… Дым… Агонь…
Няволі ноч скавала ўсё…

Мінула… Зьнікла… Замялось…
Прайшоў гадоў бязьлікі рой… —
І стуль шукаю, як ня свой,
Вясеньніх песьняў, адгалос…

Гэй, песьні волі і жыцьця!
Вы зноў ахопіце народ
І недалёкі ваш прыход
Вітаю я, чакаю я!..

1926 г.