Беларускім гімназісткам

Беларускім гімназісткам
Верш
Аўтар: Макар Краўцоў
1926 год
Крыніца: Часопіс «Беларускае слова», № 28. 14 сьнежня 1926 г., б. 2

Прапануем да спампаваньня!

Беларускім гімназісткам.

Беларусачкі!… Гімназістачкі!…
Кветкі любыя!… Ненаглядачкі!…
Чорнабровачкі!… Шэраглазачкі!
Вы! Вясны жыцьця дзіўны казачкі…
На галованьках ў вас—шэры шапачкі,
А на шапачках—троекутнічкі,
Троекутнічкі нац‘янальныя,
Сымвалічныя… абяцальныя…
У душах у вас — радасьць сьветлая,
А на тварыках—ўсьмешка ветлая;
Вы чакаеце чагось неспазнанага…
Чагось дзіўнага… пажаданага…
Сэрцы вашы ўжо тлеюць каханьнем,
Што ўзгарыць пасьля буйным жаданьнем,
А тымчасам вы—безклапотныя,
Кругам кідаеце ўзоры залётныя…
І йдзецё, хараством сваім спакушаючы,
На‘т таго ня ведаючы, а ні знаючы…

Сьветазар.