Безназоўнае (1925)/Б’юць на трывогу званы…

← Арлянятам

Б’юць на трывогу званы… Верш Аўтар: Янка Купала 1925 год

З павяўшай славы… →

Іншыя публікацыі гэтага твора: Б’юць на трывогу званы…

Прапануем да спампаваньня!

Б‘ЮЦЬ НА ТРЫВОГУ ЗВАНЫ…

Б‘юць на трывогу званы,
Клічуць да новай вясны,
К Новаму богу завуць,
Б‘юць на трывогу званы,
Б‘юць, б‘юць!..

Час ужо браць тапары,
Косы кляпаць да зары,
Покі ў грудзях жар ня згас,
Час ужо браць тапары,
Час, час!..

Рэж на дарозе дзярно,
Што ногі раніць даўно,
Ў глыб запускай свой лямеш,
Рэж на дарозе дзярно,
Рэж, рэж!..

Крыж прад вачамі стаіць,
Крыж абвіла помсты ніць,
Процьма удоўжкі і ўзвыш,
Крыж прад вачамі стаіць,
Крыж, крыж!…
Рвуць твае жылы кругом,
Родны раскідалі дом,
Гібель табе скрозь равуць,
Рвуць твае жылы кругом,
Рвуць, рвуць!..

А на трывогу званы
Б‘юць на парозе вясны,
К Новаму богу завуць,
Б’юць на трывогу званы,
Б‘юць, б‘юць!..

---