Барвенак (1924)/Хараство прыроды/Лес зімой

Лес зімой
Верш
Аўтар: Алесь Гурло
1924 год

Іншыя публікацыі гэтага твора: Лес зімой.

Прапануем да спампаваньня!

ЛЕС ЗІМОЙ.

Сьцішыўся лес і сьпіць нядбала,
І рэзвых птушак ў ім няма;
Яго як быццам закавала
Ў ланцуг сярэбраны зіма.

Галіны зьнізіліся клёну,
Цяжарам шэрань на ім лёг,
Яліна, дуб і хвоя сонна
Глядзяцца поўныя трывог…

Хістае вецер іх парою,
Ня чутна шуму, як даўней;
Скрыпяць яны цяжкой жудою
І жальбай кволых іх грудзей…

Часамі толькі заскрыгоча
Галодны, злосны недзе воўк;
Траву сухую зайка смокча —
І зноў ціша, зноў зык замоўк…

Парой чутны другія зыкі —
То недзе пілкі немы звон;
Пад гэту сумную музыку
Магутны дуб разносіць стогн…