Акрываўленая зямля (1930)/III/У дні жалю

У дні жалю
Верш
Аўтар: Паўлюк Шукайла
1930 год

Прапануем да спампаваньня!

У ДНІ ЖАЛЮ

Ня ныць,
Не стагнаць,
Ня плакаць!
Сьлёзы пакінем
Для сьмеху,
Але штосьці,
Сэрца
І памяць

Сьціскае
У маленькі арэх…

Нам у сэрца
Гісторыя загнала
Халодны цьвік
Жалю…

Ня дзіўна,
Што сьцягі
Прыбралі
У чорныя шалі.

Ня дзіўна,
Што год
За годам

Жывем
Паміраем
Мы.
…Вясна змывае
Дарогі
І памятныя
Сьляды…

Вясна
Змывае сьцежкі
І дні ўносіць
У хвалях…
Не па апошнім
І першым
Чорныя
Носім вуалі.

Ня ныць,
Не стагнаць
І ня плакаць!
Жыцьцё хай
Надзеяй гарыць,
Хаця
Сэрца і памяць
Точыць
Халодны цьвік.