Адкінуўшы фіранку…

Адкінуўшы фіранку… Верш Аўтар: Юлі Таўбін жнівень 1929 Крыніца: http://knihi.com/Juli_Taubin/Adkinuusy_firanku.html

      Адкінуўшы фіранку,
      Гляджу праз пыл і дым, —
      Сялянская фурманка
      На бруку гарадскім.

      Вітрыны і афішы
      І коміны ўгары…
      Паветра дымам дыша,
      Ў паветры дым і крык.

      І вось яна мінае
      Манто і паліто,
      Спакойныя трамваі
      І дзёрзкія аўто.

      І ў вуліц ліхаманку
      І ў спёку, ў пыл і дым
      Імчыць мая фурманка
      Па бруку гарадскім.

      (Жнівень, 1929)