І залацісьцей і сталёвей (1926)/Dies irae/Скарга і крыўда…

← Запляці залатую касу

Скарга і крыўда… Верш Аўтар: Алесь Дудар 1926 год

Dies irae, dies illa →

Прапануем да спампаваньня!

СКАРГА І КРЫЎДА…

Скарга і крыўда… Смутак і боль,
смутак і боль наўсьцяж.
Змоўкні ты, сэрца! І мы з табой
выйдзем з нізін жыцьця.

Шлях крамяністы сярод трывог,
шлях крамяністы скрозь.
Прадзед вятроў — буравей Стрыбог
вывятрыць сіньню скронь.

Сон залацісты сьлепіць скронь
пеніцца сінь над ракой…
Месяц! Вясёлкамі затрызвоць
ддя мяне і для васількоў.

Палкая радасьць і востры боль.
Цяжкі толькі пачын!..
Здолеем мы самоту з журбой,
здолеем перамагчы.

Шлях крамяністы сярод трывог
скончым і пройдзем скрозь,
Прадзед вятроў — буравей Стрыбог
вывятрыць сіньню скронь.