Ідзе вясна

З пляцоўкі Вікікрыніцы
Jump to navigation Jump to search
Ідзе вясна
Верш
Аўтар: Янка Купала
1915
Крыніца: http://rv-blr.com/rvblr/pages/book_contents.jsp?idLit=2673#31523


Ідзе вясна… На белым полі ложыць плямы!
Вада цурком цячэ з-пад сьнегу ў долы, ў ямы,
Зьлятаюцца ды дзіка гракаюць вароны…
Ідзе вясна… каб быццам сьвет збудзіці сонны.

А будзе толькі з гэтага ўсяе карысьці,
Што лес на час — каб скінуць посьле — ўзьдзене лісьце,
Ды зацьвітуць і адцьвітуць адзін раз лішні
У садзе маладжавым яблыні і вішні;

Ўсё тую ж песьню адшчабеча салавейка,
Малітву адгалосіць сонейку жалейка…
Ах, пражывеш ты, чалавеча, не напрасьне —
Яшчэ адна вясна ў душы навек загасьне.

(1915)