|
Nadyšoŭ ciopły maj,
Poŭna ŭkruh charastwa:
Dzie nia hlań — usiudy raj —
Pacham dyša trawa.
U liściastym wianku
Ścišna drewy stajać,
Pamiž ich u ciańku
Jałaŭcy ŭ wyś hladziać.
I barlinka listok
Małažlawy ŭ haru
Uzniała, i zwanok
Prykurnuŭ ŭ huščaru.
I dziaraza praz moch
Wyhladaje ziałom,
Byccam ujecca la noh
Lesu, bjučy čałom.
Šyški jełak jak ščyr
Čyrwianiacca ŭ hary: —
Moŭ siłač — bahatyr
Dremić les ŭ pancyry.
Ad kalčuhi źwiańnio
Zichacić na światle,
Krukaŭjo, warańnio
Straž dziaržyć na čale.
Sonka zołatam lje,
Ledź nia mienicca ŭ žar, —
I pramieńnie swaje
Zapuščaje ŭ huščar.
Chwału Bohu dajuć
Ptuški pieśniaj swajej,
Ścišna pčołki huduć,
Biaručy wosk ŭ wulej.
I chaciełasia-b im
Pamahčy hymn piajać,
U nastroju takim
Čym daŭžej prastajać;
Nawučycca ad ich
Mieć wiasielle ŭ žyćci
I u chwilach ciažkich
Lhi šukać ŭ zabyćci.
Tak jak pčołki ŭ cišy
Z pracy soład źbirać,
Kab wiasielle dušy
I spakoj uliwać.
I u sercy na dnie
Čuješ rozkaš žyćcia
I śmiaješsia moŭ ŭ śnie
Ad prypływu čućcia.
I sapraŭdy les toj
Zamianiajecca ŭ raj
I chacieŭ-by dušoj
Tam lacieć na wyraj…
Abudžajeśsia z mar
I niawyśnienych snoŭ,
A žyćcio słotnych chmar
Prad taboju iznoŭ.
Uziraješsia ŭ wyž
I šukaješ tych zor,
Što wiaduć nas praz kryž
U niabiesny prastor…
I nadziei pramień
Razam z wieraj tady
Prabiwajecca ŭ cień
Biespraświetnaj žudy.
Woś tady, jak dzicia,
Chočaš žyć i lubić
Kryž i cierni žyćcia,
Kab na Raj zasłužyć.
..........
Piekny les u mai,
U karonie jak car,
Tut kazaŭ-by ŭ rai
Čuješ roskašy čar.
| 
Прапануем да спампаваньня!