Я хацеў бы (Мілюць)

Я хацеў бы Аўтар: Алесь Мілюць 1931 Крыніца: Скрыжалі памяці. Кніга другая — с. 316

Прапануем да спампаваньня!

Я хацеў бы пяяць, як пяе
Майскім раннем ў бары салавей;
Я хацеў бы, каб песні мае
Грэлі праўдаю сэрцы людзей…

Я хацеў бы звінець, як звініць
Той царкоўны натрэснуты звон;
Я хацеў бы народ свой ўзбудзіць,
Каб ён скінуў адвечны свой сон…

Я хацеў бы гудзець, як гудзе
Ў полі вецер асенні з дажджом;
Я хацеў бы у братняй бядзе
Згінуць смелым і гордым байцом…

Я хацеў бы шумець, як шуміць
Перад бурай пагудзісты гай;
Я хацеў бы моц злую разбіць,
Што руйнуе радзімы мой край!..

24 кастрычніка 1931 г.
Скорычы