Эх, пашто…
| Эх, пашто... Аўтар: Мікола Сямашка Крыніца: http://pdf.kamunikat.org/download.php?item=25644-1.pdf |
Прапануем да спампаваньня!
Кругом ціш, кругом бляск,
сінь сняговая.
Вёскі зрэбныя ў гурбах ляжаць...
Эх, зіма ты,
зіма сінябровая,
люба мне табе песні складаць.
Люба мне у марозныя раніцы
слухаць спеў
завірухі ліхой...
Мае думкі, бы хмель, завіваюцца...
Бор качае сівой галавой.
Эх, пашто,
ну пашто сумаваць мне,
жудасць чорную ў сэрцы насіць,
калі дні віхрамётныя вабяць, — толькі мне маладому
і плыць.
Кругом ціш, кругом бляск,
сінь сняговая.
Вёскі зрэбныя у гурбах ляжаць...
Эх, зіма ты,
зіма сінябровая,
люба мне табе песні спяваць.