Хрэстаматыя новай беларускай літэратуры (1927)/II/Б/Якуб Колас/Песьні жальбы/Вясна

Вясна
Верш
Аўтар: Якуб Колас
1927 год

Іншыя публікацыі гэтага твора: Вясна (Вясна, вясна…).

Прапануем да спампаваньня!

Вясна.

Вясна, вясна
Жаданая!
Ты прыйдзеш зноў,
Ты вернешся.

Вясёлы сьпеў
Прыветлівы
Руччоў ў палёх
Пачуецца.

Ачнецца гай
І з песьнямі
Ў зялёны ліст
Адзенецца.^[1]

Напоўніць лес
Птушачы сьвіст,
Травою луг
Акрыецца.

А з полудня
З маланкаю
Хмурыначка
Націсьнецца;

І першы гром,
Як музыка,
Таёмна так
Пракоціцца.

І грудзь^[2] зямлі
Ўскалышыцца,
Дажджом яна
Абмыецца;

Ў прыродзе ўсё
Народзіцца,
І моладасьць
Ей вернецца;

Ды толькі мне
Ня вернешся,
Ты, моладасьць…
Ня вернешся…

Вясна, вясна
Жаданая!
Ты вернешся,
Ты вернешся!..