Хрыстаматыя беларускае літэратуры. ХІ век—1905 год/З кронік/З Рачынскай кронікі

← З Быхаўцовай кронікі

З Рачынскай кронікі Летапіс 1922 год

Ф. Скарына →

Іншыя публікацыі гэтага твора: Летапіс Рачынскага.

Прапануем да спампаваньня!

З Рачынскай кронікі.

(16 век).

… І часу панованья Монтвілова повстал цар Батыі і пошол на Рускую землю, і всю Рускую землю звоевал’ і кн̅зеі Рускіх постінал’ а іншых’ у полон’ повел’ і столец’ всее Руское землі город Кіев’ з’жог’ і пуст учыніл’, а кн̅зь велікіі Кіевскіі Дмітр’ боечыся велікое сілы і моцы его збег’ с Кіева до города Чернігова і потом доведал’ся, што город Кіев’ сожжон, і вся земля Руская спустошона, і слышал іж мужыкі меш’каюць без’ господара, а зовутся Дручане, і он’ собравшыся з людмі своімі і пошол’ ко Друцку і землю Друцкую посел’ і город’ Друческ зарубіл’ і назвал’ся велікім кн̅зем Друцкім, і в тот’ час’ доведался велікіі кн̅зь Монтвіл’ Жомоітскіі іж Руская земля спустошона і кн̅зі Рускіе розогнаны і он’ давшы воіско сыну своему Ер’дівілу і послал’ з нім панов’ своіх рад’ных’… і зашлі за реку Велю, і потом перешлі реку Немон і нашлі в чотырох мілях’ от рекі Немна гору красну і сподобалося ім і вчынілі на неі город і назвалі его Новгородок і вчыніл собе княз велікіі в нем столец і назвался велікім кн̅зем Новгородскім, і пошедшы з Новагородка і зарубіл город Городно, і потом пошол до Берестья і нашол Берестеі і Дорогічын і Мельнік от Батыя спустошоны і покажены, і он тые городы зарубіл і почал на іх княжыті…

… княз велікіі Мінгаіло собравшы воіско свое і поідеть на город Полтэсск’…, і город’ Полтэск’ возметь і зостал’ велікім князем’ Полоцкім’ і будучы ему велікім князем Новгородскім’ і Полоцкім’ пановал’ много лет і вмер, і оставіл по собе двух сынов своіх’ одного Скірмонта а другого Кгінвіла, і Скірмонт’ почнеть княжыті на Новегород’цы а Кгінвіл’ на Полоцку, і поіметь Кгінвіл’ доочку у велікого кн̅зя Тверского у Борыса іменем Марю для которое ся окрестіл’ у Рускую веру і далі ему імя Борыс і мел’ с нею сына іменем Рогволода, которого назвал Рускім іменем Васілеі, і тот Кгін’віл реченыі Борыс вчыніл город на імя свае на рецэ Березыні і назвал яго Борысов, і будучы ему Русіном был велмі набожон і вчыніл’ цэрков’ каменую в Полоцку святое Софеі, а другую святого Спаса девічыі манастыр у верх’ рекі Полоты от города у полумілю, а третюю цэрков’ монастыр’ на Бельчыцы святого Борыса і Глеба, і пануючы ему в Полоцку был ласкав на подданые своі і дал ім волност вечем ся судіті і в’ звон звоніті…

---