Сябрам

З пляцоўкі Вікікрыніцы
Jump to navigation Jump to search
Сябрам
Верш
Аўтар: Якуб Колас
1907
Крыніца: Наша Ніва. — 1907. — № 20. — 25 мая. — С.


Ой, сябры мае вы, мілы,
Дзе цяпер вы, дарагія?
Ці схавалі свае сілы?
Ці ёсьць думкі маладыя?
 
Тыя думкі, тыя мысьлі,
Што душу нам хвалявалі,
З-за каторых хмары зьвісьлі,
За што зь нівы нас сарвалі?
 
Нас з народнай ціхай нівы
Разагналі па ўсім сьвеце...
Ці здаровы вы, ці жывы?
Дзе вы, мілыя? Гукнеце!
 
Ці зьбяромся зноў калі мы
Ў нашым бедным родным краі,
Як бы птушкі пасьля зімы?
Дзе вы, хлопцы? Я гукаю!
 
Не, няпраўда! Быць ня можа,
Каб ня грэла цёпла сонца.
Наша праўда нам паможа –
Блісьне нам сьвятло ў ваконца!

(1907)