Заранкі (1924)/Дзеткам/Сьняжынкі

Сьняжынкі
Верш
Аўтар: Янка Журба
1924 год

Прапануем да спампаваньня!

СЬНЯЖЫНКІ.

Лётаюць, сыплюцца
Зоркі-сьняжынкі —
Лёгкія, белыя,
Быццам пушынкі.

Роўна так сьцелюцца
Ў вёсцы і ў полі,
Круцяцца, кружацца
Важна, паволі.

Шумна гуляць будуць
Дзеткі ў дагонкі;
Хутка пачуецца
Голас наш звонкі.

Жыва мы зробім тут
Новыя сьцежкі,
Гурмай гуляць выйдзем
Весела ў сьнежкі.

З неба ўсё сыплюцца
Сьнежныя зоркі…
Станем на саначках
Езьдзіць мы з горкі.

Бліснула сонейка
Золатам ясным —
Зьяюць сьняжыначкі
Вогнікам шчасным.

Дзеткам тут весела,
Хоць і марозна,
Цёпла за гульнямі,
Зімка ня грозна.