Статут ВКЛ (1566)/7
| ← РОЗДѢЛЪ ШЕСТОЙ О ОПЕКАХЪ | РОЗДѢЛЪ СЕМЫЙ О ЗАПИСЕХЪ И ПРОДАЖАХЪ 1566 |
РОЗДѢЛЪ ОСМЫЙ О ТЕСТАМЕНЬТЕХЪ → |
Прапануем да спампаваньня!
АРТЫКУЛЪ 1.
[правіць]О записехъ на имѣнья свои отчызные и материстые.
О записехъ на имѣнья свои отчызные материстые и всякимъ обычаемъ набытые, которій ся уфалилъ на соймѣ вальномъ Берестейскомъ, въ року тисеча пять сотъ шестдесятъ шостого, мѣсяца Іюня. Кгдыжъ въ старомъ статутѣ и въ поправахъ статуту нового бачили панове рада обоего стану, также и вси станы, на першомъ вальномъ соймѣ Берестейскомъ отъ насъ Господаря зложономъ отмѣнити четыри артыкулы въ роздѣлѣ томъ семомъ о записехъ: первый, другій, третій и четвертый и праве ихъ на сторону отложити и на тое мѣстце тотъ нижей описаный установити и въ статутъ вложыти, якожъ на то сполнѣ и одностайнѣ вси зезволившыся и уфалившы, до насъ Господара донесли и утверженье того насъ просили. Мы Господаръ, приставуючы тому зволенью и уфалы ихъ, утвержаемъ мѣсто оныхъ чотырохъ артыкуловъ вышъ помененыхъ, откладаючы ихъ на сторону, на передъ нижей описаный ку уживанью и справованью въ томъ панствѣ Великомъ Князствѣ Литовскомъ и во всихъ земляхъ ему належачихъ, межи всими станы и особами праву земскому и сему статуту прислухаючихъ. Што вси отъ сего часу и дня волно и моцно кождому имѣнья свои отчызные и земскіе материстые и выслужоные купленые и якимъ кольвекъ обычаемъ набытые и названые, не смотречы третее и двохъ частей, яко передъ тымъ бывало въ статутѣ обычаемъ стародавнымъ, але все съ домомъ, хто ихъ што маеть, будь тежъ половицу або и которую ихъ часть, и по собѣ и у одно або люди земли, што хотя отъ нихъ водлѣ доброе воли своее и мысли, отдати продати даровати и записати заставити, отъ дѣтей и близкихъ отдалити, подлѣ баченья своего тымъ шафовати. И хотя бы перво которую часть албо половицу имѣнья своего альбо што кольвекъ люди земли кому продалъ записалъ; тогды остаточныхъ имѣней своихъ потому жъ воленъ шафовати вѣчностью заставою, якъ воля его будеть, отдаляючи то отъ дѣтей близкихъ своихъ. А вѣдьже кождый таковый, або продаеть альбо даруеть, самъ очивисте передъ нами Господаремъ объявити маеть, або передъ урядомъ земскимъ, гдѣ въ которомъ повѣтѣ тое имѣнье лежитъ, або до которого суду земского прислухаеть. А пакли бы до которого повѣту было далеко, въ которомъ имѣнье тое лежитъ, алимъьбо до которого суду прислухаеть, тогды будеть еиу вольно записъ свой оповѣдати и до книгъ записати; а тотъ кому, продано або якимъ кольвекъ обычаемъ записано будетъ, съ тымъ листомъ записомъ сво и тежъ записомъ врядовымъ маеть ѣхати або послати до того вряду земского повѣтового, гдѣ въ которомъ повѣтѣ имѣнье лежати будеть, а то оповѣдавши маеть до книгъ земскихъ тотъ записъ свой увести, а урядъ урядови вѣрити маеть.
АРТЫКУЛЪ 2.
[правіць]Если будетъ кому потреба записъ чинити кромѣ роковъ земскихъ отъ лежачихъ книгъ.
Тежъ хто бы хотѣлъ што записати оселость кому вѣчностью межи роки судовыми, безъ которыхъ судъ не звыкъ засѣдывати на судѣ, и книги подлугъ статуту лежати не будуть; тогды маеть прійти передъ врядъ замковый дворный, гдѣ судъ отъ насъ Господара засажоны, и тамъ же записъ справеный передъ воеводою або старостою альбо державцою, гдѣ такіе суды суть, оказати вызнати и дати его до книгь записати замковыхъ слово отъ слова, и выписъ взяти, который выписъ замковый будеть тривати до году а не далей. А въ томъ году маеть быти оный записъ пренесеный до книхъ земскихъ и при врядникохъ земскихъ въ тые жъ книги земскіе дати записати, тымъ обычаемъ таковый записъ маеть быти при моцы захованъ, и тотъ, што имъ кому будеть записано, маеть то одержати. А гдѣ бы такъ доводу не вчинилъ; тогды таковый записъ жадное моцы мѣти и за оным тую речъ, што кому записано, одержати не маеть. А въ небытности воеводъ старостъ и державецъ судовыхъ на таковыхъ урядехъ и мѣстцахъ ихъ; такіе записи за листы вызнаными предся очевисто особы будучи сами, хто што записуеть, вызнавшы и такіе записы сами жъ оказавши вряду тому, то естъ передъ подстаростимъ намѣстниками и при судьи, отъ таковыхъ особъ урядовыхъ могуть быти и выписы даваны подъ ихъ печатьми и съ подписаньемъ рукъ ихъ, а при намней двухъ, если бы вси три писати не вмѣли.
АРТЫКУЛЪ 3.
[правіць]Хто бы хотѣлъ имѣнье свое отчизное продати або зоставити.
Хочемъ тежъ мѣти и уставуемъ, абы кождый таковый, хто бы хотѣлъ имѣнье свое отчизное продати або заставити; тогды маеть прійти передъ насъ Господара або передъ врядъ земскій, въ которомъ повѣтѣ тое имѣнье лежитъ, объявити передъ судомъ земскимъ, которая продажа за таковымъ обычаемъ будеть моцна и вѣчнѣ держана, хотя бы на то и потверженья нашого господарскаго не было. А вѣдьже тотъ, кому будеть записано, того жъ часу маеть, взявшы возного зъ уряду повѣтового, увойти въ держанье и того имѣнья; пакли бы по ономъ записѣ въ держанье того имѣнья не пришолъ, а давность земскую десеть лѣтъ промолчалъ, тогды таковая продажа и застава потомъ моцы ни которое мѣти не будеть.
АРТЫКУЛЪ 4.
[правіць]О вольности продати третюю часть на вѣчность.
Уставуемъ, хто бы хотѣлъ имѣнье свое отчизное продати на вѣчность; тогды только третюю часть имѣнья отчизного вольно ему на вѣчность продати, а двѣ части того жъ имѣнья въ сумѣ зоставити. А вѣдьже не маеть большей на тые двѣ части имѣнья отчизного брати, только такъ яко бы сума не превышала на уфалу и постановене наше, яко вышей въ роздѣлѣ о судьяхъ естъ написано; а гдѣ бы большъ на тые двѣ части пенезей дано, тогды дѣти яко близкіе не будуть повинни большъ платити, только шацункомъ потому яко вышей описано, а што будеть превышати, то оному, хто вышей далъ, маеть згинути.
АРТЫКУЛЪ 5.
[правіць]О записехъ имѣней купныхъ.
Уставуемъ тежъ, ижъ кождому будеть вольно имѣнье свое куплю и выслугу отдати и продати и кому хотечы записати, бы тежъ кому и обчому, отъ дѣтей и близкихъ своихъ все не менуючи третее части; а вѣдь же тые тымъ же обычаемъ, пришедши передъ насъ Господаря або передъ врядъ земскій часу роковъ судовыхъ, маеть объявити и сознати и до книгъ земскихъ тую продажу свою записати, за которымъ оповѣданьемъ тая продажа маеть вѣчнѣ держана быти. А хто бы хотѣлъ записати нам не объявивши передъ нами Господаремъ, або передъ паны рады нашими, або тежъ передъ врядомъ земскимъ, бы тежъ и печати людей стороннихъ у того листу были; тогды таковый листъ або запис у права моцы никоторое мѣти не будеть. А естли бы хто продалъ имѣнье на рокохъ судовыхъ, таковый маеть передъ врядомъ замковымъ сознати; и тотъ, хто купилъ, взявши выписъ зъ уряду замкового, маеть потомъ на першихъ рокохъ судовыхъ земскихъ перенести и дати записати [1]. Шаблон:Примечания
АРТЫКУЛЪ 7.
[правіць]Не маеть нихто никому жадного спадку записовати, чого въ рукахъ немаеть.
Тежъ естли бы хто хотѣлъ кому записати которимъ спадкомъ, который бы мѣлъ на него прійти вѣновье або материстое або которою кольвекъ близкостью, которій бы кольвекъ по ближнемъ по пустой руцѣ мѣло спасти, а тотъ бы еще былъ живъ; тогды такового спадку нихто не можеть записовати ни продати а ни отдати а ни сумы никоторое на томъ записовати, оли жъ бы въ рукахъ своихъ мѣлъ. А если бы хто кому таковый спадокъ записалъ або продалъ тежъ записалъ на томъ которую суму пенезей, таковый записъ передъ правомъ не маеть быти держанъ, бо нихто никому не можеть дати, чого въ рукахъ своихъ не маеть. А пакли бы хто кому што записалъ отъ своихъ близкихъ, не маючи того въ рукахъ, самъ на передъ умеръ, однакожъ записъ ни в вошто маеть обернень быти предсе, то маеть прійти на прирожоныхъ близкихъ.
АРТЫКУЛЪ 8.
[правіць]Хто бы кому записалъ имѣнье або землю по своемъ животѣ, а тотъ, кому записано, того смерти не дождалъ и напередъ умеръ.
Тежъ уставуемъ, если бы хто кому записалъ имѣнье або люди по своемъ животѣ, а тот, которому будеть тая речъ записана, того смерти не дождалъ, которій то будеть ему записалъ, и самъ напередъ умеръ; тогды тотъ тую речъ можеть иному записати, кому воля его будеть. Нижли еслибы тотъ живъ былъ, а онъ ему записавши, и потомъ иншому Другимъ записомъ хотѣлъ записати; тогды отъ першый записъ маеть при моцы зостати, а послѣдній ни во што маеть оберненъ быти. Такъ тежъ хто бы кому имѣнье або люди або земли продалъ; тогды тотъ, хто первей купилъ, маеть то одержати, а тотъ, которій опослѣ купилъ, маеть пенезей своихъ на истцу смотрѣти.
АРТЫКУЛЪ 9.
[правіць]Хто бы на которую кольве речъ добровольнѣ далъ записъ, тотъ маеть при моцы зостати.
Тежъ уставуемъ, если бы ся хто кому записалъ на которую кольвекъ речъ рухомую або суму позычоную добровольнѣ записъ, подъ печатью своею и подъ печатьми людей добрихъ подлѣ обычаю права учиненый; таковый кождый маеть у таковомъ записѣ зостати, а тотъ записъ кождый маеть управа мѣти моцъ.
АРТЫКУЛЪ 10.
[правіць]О имѣнье должное и давность земскую.
Тежъ уставуемъ, коли хто купилъ якое дѣдицство и держалъ съ покоемъ заплатившы, а на томъ же бы имѣнью хто иншый долгъ мѣлъ первей врядовнѣ записаный, поки еще было не продано, и въ молчанью былъ о тоть долгь десеть летъ, черезъ давность земскую, и правомъ его не доходилъ; таковый хотя и листы упоминальные мѣлъ, то не маеть на томъ имѣньи долгу смотрѣти, але истца у своихъ пенязяхъ искати. А естьли бы тотъ истецъ на мѣлъ чимъ платити; тогды въ томъ долгу маеть его судъ за шлюбъ выдати, нижли если бы отъ того [2] долгь также врядовнѣ записаный до права позывалъ того, который имѣнье держитъ тое, давности земское не омѣшкавшы, тому подлугъ запису его першого тотъ долг на томъ же першомъ имѣнью маеть быти держанъ, а тотъ, который въ держанью того дѣдицства, оный долгъ маеть заплатити тому, хто первшый записъ маеть, а самъ маеть тыхъ пенезей и кождого оного накладу на истцу доискивати. Шаблон:Примечания
АРТЫКУЛЪ 11.
[правіць]Хтобы подъ кимъ искалъ близкости, а тотъ держалъ имѣнье записомъ слушнымъ.
Хто бы под кимъ имѣнья искалъ близкости своей, а тотъ бы, подъ кимъ ищетъ, держалъ тое имѣнье записомъ слушнымъ, а повѣдилъ бы, ижъ то не одному ему але иншимъ тымъ же записомъ тое имѣнье записано, и рекъ бы : про то я безъ нихъ о тое имѣнье не хочу отповѣдати; тогды тотъ, хто имѣнья ищетъ, маеть оныхъ всихъ учасниковъ припозвати, которимъ тотъ записъ служитъ.
АРТЫКУЛЪ 12.
[правіць]О долги двохъ або колко на одномъ имѣнью.
Коли бы хто имѣнье закупное у которой сумѣ держалъ, а другій бы ся долгомъ своимъ ку тому жъ имѣнью приповѣдалъ, менечи ижъ темъ ему на томъ же имѣнью сума есть описана, и съ права бы тую ему перевелъ, и давность бы земская не замолчана, а тое бы имѣнье обои сумы стояло; тогды тотъ который маеть большую суму повиненъ заплатити, або обадва тое имѣнье иншому въ обоей сумѣ зоставити, а тые пенези межи себе водле записовъ роздѣлити. А пакли бы колько должниковъ ровными долги до одного имѣнья збѣглося, а имѣнье бы вже за тые долги не стояло; тогды хто бедеть мѣти первшій записъ, або бы въ держанью имѣнья былъ, а имѣнье тежъ большое сумы не стоить, тогды (тотъ при таковомъ имѣнью зостати маеть, а тые зъ) остатными записы мають тыхъ пенязей своихъ на истцу доходити.
АТЫКУЛЪ 13.
[правіць]О речъ заставную, хто въ большой сумѣ заведеть.
Тежъ коли бы хто речъ заставную у большой сумѣ зоставилъ, а тотъ чыя речъ у кого ль бы свое засталъ, и ку бранью пенезей, которые пенези або предокъ его будеть на тую речъ взялъ, и ку праву его позвалъ, а передъ правомъ суму пенезей водлѣ запису своего положилъ; таковые пенези отдавши речъ свою маеть взяти, а тотъ, которій на чужую речъ большую суму даеть, на истцы нехай того собѣ смотритъ, што бедеть на звышъ первое сумы далъ.
АРТЫКУЛЪ 14.
[правіць]Кождая застава давности мѣти не можеть.
Хочемъ тежъ мѣти и уставуемъ, абы кождая застава давности земское не мѣла; и вольно будеть всякому дѣдичу, отложивши передъ правомъ пенези, дѣдицтва своего дойти, такъ за правомъ своимъ прирожонымъ яко кольвекъ и набытымъ.
АРТЫКУЛЪ 15.
[правіць]О одкладанью пенезей на заставу.
Коли бы хто ииѣнье або иншую речъ которую у пенезехъ заставилъ на рокъ мененый, и хотѣлъ бы пенези ёго на року ему отдати, а заставу къ собѣ взяти, а не будеть ли хотѣлъ пенязей въ его своихъ брати ани заставы еиу попустити, а позванъ бы былъ ку праву, абы пенязи свои взялъ, а онъ бы на року завитомъ не хотѣлъ стати; тогды жалобникъ передъ правомъ пенязи маеть положыти, а врядъ ему маеть дати увязанье во имѣнье, и кождый заставу свою зъ уряду одержати маеть водлѣ опису своего. Пакли бы оный, которій имѣнье або которые оные речы заставнымъ обычаемъ закупилъ, а на року позваномъ сталъ; тогды взявшые тые пенязи свое заставы, то есть имѣнья лежачаго або рухомыхъ речей, жалобнику маеть поступити водлугъ запису своего и умовы, жадною давностью не отбываючи. Пакли бы такому заставилъ на рокъ; тогды естьли тотъ жывъ, а рокъ пришолъ, а онъ на рокъ не выкупил; тогды онъ тую заставу маеть держати, ажъ до другого року не можеть окуповати водлѣ запису на то даного. Нижли бы тотъ, хто заставилъ, умеръ свое заставы не выкупившы; а сынъ заставцы, або близкіе тогды того року не мають смотрѣти, але кгды будеть припозванъ, безъ року маеть тотъ пенези взяти а заставы поступити.
АРТЫКУЛЪ 16.
[правіць]Рокъ праву о заставную речъ маетъ быти положонъ завитый.
Хочемъ тежъ мѣти и уставуемъ то, ижъ кождый первый рокъ за позвы зложоный о кождую речъ заставную маеть быти завитый подъ страченьемъ права; отъ которого часу позванъ будеть тотъ, который заставу держитъ, и отъ того часу не маеть большей за имѣней казати жадныхъ доходовъ и пожитковъ брати, а што бы кольвекъ послѣ положенья позву черезъ возного зъ имѣнья того взялъ, то все маеть при выкупанью имѣнья ему вернути.
АРТЫКУЛЪ 17.
[правіць]Хто бы што запродалъ на рокъ.
Тежъ если бы хто кому заставилъ рухомую речъ на рокъ подъ страченьемъ, а коли бы рокъ пришолъ, а тотъ, хто заставилъ, не выкупилъ; тогды тотъ, хто закупилъ, оповѣдавшися вряду можеть тые речи обернути, кгды хочеть, ку своей потребѣ на вѣчность.
АРТЫКУЛЪ 18.
[правіць]О имѣнье заставное, безъ року не окупати.
Такъ тежъ имѣнье если бы хто кому заставилъ на рокъ подъ страченьемъ на упадъ; тогды если бы рокъ пришолъ, а тотъ, хто заставилъ имѣнье, на тотъ рокъ не могъ выкупити; тогды тотъ, хто закупилъ, и по ономъ року врядовнѣ обослати маеть ближнихъ, а ближніе не могли бы по ономъ обосланью до году того имѣнья окупити, тогды тотъ, хто закупилъ, по ономъ году, естьли такій не выкупить, маеть вѣчнѣ держати.
АРТЫКУЛЪ 19.
[правіць]О отнятье имѣнья заставного.
Тежъ уставуемъ, естьли бы хто заставилъ кому имѣнье або люди въ которой сумѣ пенезей на рокъ, и засе пенезей не заплатившы тое имѣнье або люди, што будеть заставилъ, въ него отнялъ до року; тогды тому маеть кгвалту платити дванадцать рублей грошей и заруки въ листѣ описаные, а колько будеть до року тые люди, колко ихъ заставитъ, не робили, за кождый тыжъ день маеть навезки платити за службу суполную по шести грошей, а люди предся маеть пустити. А если бы одинъ другого заставилъ люди або землю, а стороны пришедшы бы хто третій тые люди отнялъ; тогды кому то отнято будеть, ли не всхочеть ли позвати отъ кого ему кривда, тогды маеть позвати оного, хто заставилъ, а онъ с права будеть повиненъ ему, хто заставилъ, очищати, а не чищитъ ли, ино такъ можными людьми землями маеть то нагородити, або и самого истца не будеть, ли тогды только съ тое заставы маеть доходити на томъ, хто заставу въ него отыймуеть.
АРТЫКУЛЪ 20.
[правіць]О речъ рухомую въ заставѣ.
Уставуемъ, коли бы хто кому заставилъ въ сумѣ пенезей якую колвекъ речъ рухомую, кромъ дѣдицства лежачого, на рокъ, а тотъ бы маючы заставу припозвалъ того, абы заставу свою выкупилъ, а онъ бы съ тое заставы окупити не хотѣлъ; тогды врядъ маеть ему дозволити и допустити тые речы рухомые продати, и што бы звышей на той заставѣ на одну суму его превышало, тогды тое, што будеть назвышъ, маеть оному, чія то застава была, вернути. А гдѣ бы безъ року тая застава запроДана; тогды врядъ маеть рокъ положити чотыри недѣли, и на которій маеть выкупити заставу свою, а не выкупить ли на оный рокъ, тогды по оному року подъ тымъ же способомъ, яко вышей описано, мають о тую ся заставу росправити.
АРТЫКУЛЪ 21.
[правіць]Хто бы кому заставилъ коня або вола безъ року.
Уставуемъ, если бы хто кому заставилъ коня або вола безъ року або и на рокъ, а въ томъ часѣ оное заставы конь альбо волъ здохнетъ безъ причины ображеня, ижъ робечы имъ не порвалъ, або голодомъ не вморилъ; тогды такового коня або вола платити не повиненъ, тому скуру показати, и тые пенези въ чомъ былъ закупилъ, тратитъ.
АРТЫКУЛЪ 22.
[правіць]О речахъ заставныхъ, што вы згинуло въ чіемъ схованью.
Уставуемъ, хто бы мѣлъ речи въ себе якіе кольвекъ рухомые въ заставѣ або у схованью, а тые бы речи были сполу у въ одномъ кгмаху зъ речьми домоваго господаря, и съ пригоды огнемъ погорѣло або покрадены, а онъ бы то вряду, подъ которымъ сѣдить, тогды жъ оповѣдалъ, и къ тому будеть ли еще при тыхъ и властивое маетности его што выкрадено або сгорѣло; тогды маеть на томъ самъ присегнути, ижъ оныхъ речей не користилъ, и ничого ку пожитку своему не обернулъ, за таковымъ отприсяженьемъ маеть быти воленъ. А пакли бы повѣдалъ, же толко того речы, хто далъ ховати, сгорѣли або покрадены, а его самого господаря домового цѣлы; таковый тые речы вси повиненъ будеть оному вернути або заплатити, а естли въ сумѣ пенезей заставлено, ино пенези взяти, а тые речи предсе вернути, на што слушный доводъ учинитъ. Такъ тежъ если бы хто у кого зложилъ въ склепѣ або у якомъ схованью речы своее и замкнулъ, а домовый господарь тые речи въ небытности его рушылъ, або и на иншое мѣстце перенесъ, а въ томъ бы се шкода стала; тогды тотъ, хто рушилъ, маеть тую всю шкоду платити за слушнымъ доводомъ або присегою оного шкодного.
АРТЫКУЛЪ 23.
[правіць]О заповѣданью речей рухомых чужихъ.
Уставуемъ, кгды бы хто свое речы далъ въ схованье кому, а иншій зъ стороны доведавшися о тыхъ речахъ въ захованью приповѣдался, ижъ тотъ и тые, хто тые речы зложилъ, виненъ ему албо долженъ; тогды господаръ маеть тые речы у себѣ мѣти, а ихъ не выдавати до росправы. А естли бы ихъ хто заповѣдалъ, хотѣлъ отъѣхать прочъ, тот маеть на мѣстце свое передъ судомъ прокуратора встановити, который въ небытности его будеть оного долгу доходити; пакли бы самъ ѣхалъ, а прокуратора не зоставилъ, ино тые речы, которые заповѣдалъ, мають оному выданы быти, чіи суть, а въ томъ господаръ домовый никоторое трудности ани шкоды мѣть не маеть.
АРТЫКУЛЪ 24.
[правіць]О листы на долги на имѣнья и на заставы згинулые.
Тежъ уставуемъ, кому бы листы на долги и на заставы на имѣнья згинулые гдѣ кольвекъ на дорозѣ отъ огню або отъ воды и якимъ кольвекъ обычаемъ стороны, а тот, кому листы тые належали, которого жъ часу по оной згубѣ передъ нами Господаремъ або передъ врядомъ оповѣдалъ и записати далъ, а потомъ пришло бы ку праву; тогды тотъ, хто листы стратилъ або кому тые листы прислухають и належать, маеть довести людьми добрыми вѣры годными, которые листы видѣли и ихъ свѣдомы, а потомъ самъ и зъ свѣдками, колько ихъ можеть мѣти, на томъ прысегнути маеть, ижъ таковые листы страчоны, а кгды того доведетъ людьми добрыми и присегою своею, маеть оную речъ, на што листы згинули одержати.
АРТЫКУЛЪ 25.
[правіць]Якъ много безъ листу вызнаного маеть позычити.
Уставуемъ, ижъ кождый шляхтичъ мѣщанинъ нихто иншій не маеть безъ листу вызнаного болшъ позычити десети копъ грошей; а если далъ большую суму, а листу вызнаного на то не мѣлъ, тогды тотъ, хто большъ дал безъ листу вызнаного, пенези тратититъ, а тотъ, который позычилъ, не повиненъ большъ платити только десеть копъ грошей и то за присегою оного, хто на немъ тыхъ пенезей доходитъ.
АРТЫКУЛЪ 26.
[правіць]О позычкахъ купецскихъ.
Тежъ купцы мѣщане жидове не шляхта реистрами, окромъ записанья до книгъ або церокграфовъ, долговъ никоторыхъ доходити не могуть. А вѣдьже хто бы хотѣлъ до листовъ печати прикладати, тогды до всякихъ листовъ на заочную просьбу ани тежъ написанье листовъ на заочную просьбу печати прикладаны быти не мають, кромъ устное и очевистое прозбы, маючи певную вѣдомость, што на тыхъ листехъ записныхъ будеть написано.